家住油麻地平安大樓、身兼業主立案法團主席的江太，有見住了多年的大廈年事已高，問題多多，一直想「執番正棟樓」，但苦無軍師指點，不知從何入手。「啱啱知道政府係2009年搞個咗『樓宇更新大行動』，一心諗住每戶有$16,000資助，長者仲有$40,000添，咁著數梗係申請啦！」遂與其他業主商量參加計劃，找一個可靠的顧問公司同承建商翻新樓宇，怎知…… 

招標得個吉
「參加『樓宇更新大行動』嘅大廈要跟住本《工程維修指引》進行維修，本嘢成60頁，睇見都頭痕！我哋法團開會傾咗好多次，至登到報紙揀到個顧問。本來已準備好簽約，咁啱果陣時見市建局同廉正公署搞咗個關於專業誠信工程管理簡介會，我哋咪派人去聽下囉，廉署代表叫我哋留意吓顧問公司收取嘅費用係唔係響一個合理嘅水平。如果唔係就會有較大嘅圍標風險。我哋聽完，諗諗吓發覺自己大廈嘅情況同廉署講嘅好相似，所以就叫咗市建局果邊同我哋開會研究。市建局提供咗好多市場資訊，仲幫手講解如何分析顧問公司嘅人力架構同收費等，發覺有啲顧問公司嘅收費完全唔合理！最終我哋法團決定揾過第二間，最慘係要重新登過報紙，由頭搞過，激死人！」

低價搶標風險高
「我地嘅職責係為申請咗『樓宇更新大行動』嘅法團提供有關嘅技術支援及資助。當法團揾我哋開會時，我哋會同法團分享番啲市場資訊，協助佢哋做標書分析，好像平安大樓的個案，我哋做好分析之後發現有專業人士每個鐘頭收費仲低過最低工資廿八蚊，於是我哋即時向法團解釋咩叫唔合理嘅收費，同埋圍標嘅風險等，並建議江太及法團小心考慮。」負責處理平安大樓申請的市建局樓宇復修部助理經理李世忠道。

所謂低價回標或低價搶標，是指有些顧問公司為了更容易得到顧問合約，往往以大大低於市價的價落標，在得到合約後有機會再在其他地方賺回差價，例如在工程承辦商進行投標時，從中協議標高工程價目。一般情況下，法團往往會被較低的顧問收費所吸引，但往後卻可能需要支付非常高昂的工程費用，得不償失！

聽過局方的分析及衡量過有關風險，江太決定聯同業主作第二次招標，希望找到忠誠可靠的顧問公司，盡快攪番掂幢樓。

第二次觸礁
「第二次招標收到啲顧問公司報價，發現標價差距好大，由唔夠二萬蚊到幾十萬不等，法團今次參考咗市建局嘅意見，為所有投標者嘅報價同埋公司人力架構做分析，首先剔除收費唔合理嘅公司，跟住經幾輪面試，然後開業主大會揀咗個顧問公司出嚟，諗住今次終於搞掂啦，係簽合約前循例都將份顧問合約送去俾市建局睇吓，點知佢哋又話有啲意見比我哋考慮，心諗唔通今次又有問題？」

「我哋發現法團揀嘅顧問公司所聘用嘅認可人士，同時又係另一間註冊承建商嘅獲授權簽署人。顧問公司及認可人士嘅職責係協助法團招聘建築承建商進行維修，身份理應處於中立位置，若顧問公司與某些 承建商有直接關係，可能會影響佢中立嘅身份，亦有可能影響招標公平性。」李世忠道。

「聽完市建局意見之後，我哋梗係對果間公司失去信心，所以無奈又要召開大會進行表決。我哋大廈成300伙業主，攪一次大會要浪費幾多人力物力至得架？攪咗一輪得個吉，你話激唔激氣吖！雖然市建局提供嘅資訊係幫到我哋，但係一次係咁，兩次又係咁，都唔知佢哋係咪有心整蠱！」江太道。

「我哋嘅角色係中立嘅，絕對唔會偏幫任何一間顧問公司。我哋亦好明白平安大樓法團面對揀選顧問公司嘅煩惱，雖然知道佢哋攪一次業主大會係一件好困難嘅事，不過為咗要做好維修，我哋唯有硬住頭皮建議佢地深思熟慮。」李世忠道。

柳暗花明又一村
第三次挑選，選了一間報價較為合理，及沒有不良紀錄的顧問公司。

「聽咗市建局嘅意見，以及綜合過去兩次招標的經驗，我哋終於揀到一間價錢合理嘅顧問公司，間公司好好㗎，啲野跟得好足，我地一班業主都好放心。」江太說。

結果經過約10個月的裝修工程後，平安大樓脫胎換骨。

「整完又幾鬼靚喎！聽講主席參考咗佢喺新加坡見到啲新樓嘅設計而諗出嚟，啲油嘅顏色又幾高貴，成棟樓唔同晒！」業主陳太表示樓宇翻新後令住客住得開心。

「以前幢樓天花又漏水啲渠又塞，而家整好晒，放工返嚟見到都開心啲，真係多謝市建局幫手。」住戶楊先生道。

「整好幢樓，樓價都升多啲啦」業主簡先生道。

「今次真係要多謝市建局，如果唔係我地揀咗啲唔可靠嘅公司就有排煩喇！我個女住果幢樓就係搵咗原先第一次報價超平果間公司做顧問，結果維修費貴咗幾倍，幢樓仲要整嚟整去都有手尾，真係貼錢買難受呀！」江太道。

「住戶開心，我哋幾辛苦都值得。好多居民開始時不斷鬧我地，到最後有商有量，明白我哋嘅苦心，呢啲就係我地工作所得到嘅滿足感。」李世忠說。